Volum (2), Issue (12b), December , 2011

Editor Cafung : 

...... DBCF Meifar kumpi kumkhat sung in siar saktu zateparah siseh, Cahram January ihsin December, 2011 tu thla tiang, thlatin Pathian Thu in ngan saktu kan Pastor Rev. Hehemiah Sui Nei Piang parah le Biazai maw zetzet in ngan saktu Pi Hrang Tin Sung (Nu President) parah siseh, a caangcang ih cahram le thuthang, thuthan ding in kuat ṭheutu zate parah siseh, Ramleng ihsin Online in Cahram in kuat theutu zate parah lungawinak sim cawk lo kan nei a si. Pathian in kumthar sungah lungawinak, hnangamnak, daihnak, hlawhtlinnak thawn lo umpi cio hram seh ...

..............

Lungawi Thusimnak

By: Rev. Nehemiah Sui Nei Piang (DBCF Pastor)

2011 Sungah DBCF in Pathian zangfahnak maksak kan dawnmi le kan rawngbawlnak ka thlir saal tikah ka lungawituk ah ka mitthli a luan caan a tam. Pathian in thlaanmual sangkaa in khar sak le phu lo a duhdawtnak sungah in tlanglengter hi mak ka ti. Kawhhran Upa pawl in Pathian le member duhdawtnak taktak nei in le kei a Lo Ram sungih tling lo cingte in sawm dawl daan pawl khal hi leitlun ka dam sungah ka rul thei lo ding. Culawng si lo Nu Upa, Mino Upa, pawl khalin ti theitawk in DBCF  hrang le Pathian ram kauh sinsinnak ah thazaang suah in nan ṭuanmi le bulpak in in zo daan pawl ka hmuh ah lungawinak tampi ka nei a si.

DBCF rawngbawlnak Sunday School Saya/sayamah pawl kan nauhak mi 124 lai kilkhawi sak ih Nipi zingtinte tho in an caan sunglawi an pek sian zia le DBCF an duhdawt zia ka hmuh hin thazaang tamtuk ka ngah a si.

Thlatin meifar sung ihsin thuthang ṭhaṭha le Pathian thu mi tampi hnenih ṭhehdarh dingih ṭan latu le caan sunglawi petu Chief Editor hnehah lungawi thu ka sim duh. Kawhhran tin ihsin thlatin a siartu le thapetu zate parah tla lungawinak simcawk lo ka nei a si.

Tui kum 2011 Sungih kan  hlawhtlinnak le hmailampan ih ke kan kar thei vivonak hi DBCF Member kan zaten pekawknak phunphun ih kan `an rual ruangah a siih Sumpai in siseh, Thlacamnak in siseh, ka thanau caan le beidon caan khalih thahnem ngaitak ih in bawmtu le thazaang in pe ṭheutu le thla in cam sak ringringtu nan zate parah kaa ih sim thei lo mi lungawinak taktak ka nei a si. Ka tlin lonak in theithiam ih ziangkim ih DBCF member zate in in bawmnak le kan ṭanrual ruangah tuisun ni tiang lungawizet ih ke kan kar theinak a si. Pathian in sunlawinak hmuahhmuah co thluh seh law.... Rom 12:5 :Cubangtuk in kannih khal mi tam pi kan si na in Khrih thawn kan pehzawmawknak ahcun pumkhat kan si. Kan ruangpi ih taksa `hen pawl an pehawk thluh vekin kan peh aw thluh ve a si.

Hmailam khal ah DBCF Pathian in thawsuah pe sinsin seh... DBCF sungih Rawngbawltu hmuahhmuah le hmuntin kim ih kan member zate hnen khalah 2012 kum rori ah PATHIAN malsawm zatintian thleng hram seh.

Lungawinak tampi thawn... Rev.Nehemiah Sui Nei Piang (Pastor)
........................




Ramleng ih um DBCF Member pawl ih Cibai buknak .....

from....  Gabriel MoeMoeKyaw -Australia  (DBCF Y Prisident hlun)

DBCF member zaten Bawipa Khrih hminin nan kut zaṭial ka lo kai. 2012 hi lungawi le sopar te in nan hman cio thei ka bei sei. 1Korin 6:19-20 -nak ih a sim bangin kan nunnak le kan taksa, kan thlarau hi kanmai ta a si lo ih Pathian ta a si ruangah kan nun in Pathian sunlawi cio uhsi! ti thei in, in neitu hrangah hmang cio hram uh ti ah ka lo sawm duh. Pathian hrangah tiin thinlung hmunkhat pu le lungrualte’n kan damsung caan tawite ahhin ṭuantlang in kum thar khal hmang tlang cio dingah ka lo sawm in ka ngen a si. Nan hmen ih tel tla ka cak ziangahtile DBCF vekih Pathian thu ah lungrul tak ih kekar tlang hi an vang nasa, nan cangvaihnak tinkim hi Pathian sunlawinak hrang lawngah si seh. Lungawi le nuamtak in Kumthar cibai ka lo buk a si. 

.... from... Pu Hrang Hu  @ Bawi Bawi pu (Canada)

DBCF Nan zate parah ka lungwi nasa. Khawitawk khalah um u sihla kan piannak vekin kei cu Delhi kha ka ngaina. Curuangah ka thinlung zate in ka lo hngilh lo. Kan Biakinn sungih kan khawmnak kha ka mitthlam in a cuang ringring. Zarhpi Ni a kimtinte ka lo hngilh thei lo. Thla in cam sak ṭheutu nan zate parah Bawipa thlawsuah lo pek seh law? Kumthar cun thinlung thar, ruahnak thar, damnak thar thawn Pathian in lo umpi hram seh tiin thlacamnak thawn cibai ka lo buk....

;;;;;;;;;;;;;;;;;;;;;;;;;;;;;;;;;;;



(Sermon)

ZUAM-AWKNAK THIANGHLIM (Pilipi 3:13)

By: Rev. Nehamiah Sui Nei Piang

                           
Tui tum January 1. 2012, DBCF Meifar a siartu pawl hmuahhmuah nan zaten kumthar cibai ka lo buk, Rundamnak famkim in petu Pathian zaangfahnak zarin 2011 cu tluangten kan hmang cio ih Pathian hmin ka thangṭhat taktak a si. Tutum ih kumthar thucah ka sim duhmi le ruattlang dingih ka duhmi cu “Zuam awknak thianghlim” ti hi a siih zuamawknak thianghlim timi cu mah le mah zuamawknak hi a si. Ka Bible cang hrilmi cu: Philipi 3:13 “Ka u le ka nau pawl, cumi cu ka co ngah zo, ti’n ka ruat hrimhrim lo, ka tuahmi cu pakhat lawng a si; ka dunglam ih a luan cia thil kha hngilhsan tahratin ka hmailam ih a ummi kha ban dingah ka dawh aw rero a si.”

1.... A liamcia mi 2011 kum na hman daan ah na di a riam tawk maw? ... Taksa thlarau daan ih na tumtahmi paziat na tuah suak thei? ... Na tuah dingmi paziat na tuah lo? ... Na tuah lo dingmi paziat na tuah? ... Na caan vawiziat a lakin na hmang? ... mi thin naunak le beidonnak veiziat na rel? ... thuphan veiziat na relih mi paziat na bum? ... Na paisa a ṭul lonak ah ziangzat na hmang? ... Mi ziangzat na ngaidam? ... Ziang tuahnak ah na caan sunglawi na hmang tam bik? ... Na caan veiziat a lak in na hmang? ... mi paziat na bawm ih thazaang na pe? ... mi paziat mitthli na luangter ih na riahsiater? ... Pathian thin veiziat na hengter? ... na parih thil `ha lo tuahtu paziat na ngaidam? ... Na ti thei tawk te in PATHIAN hrang le na Kawhhran hrangah ziangtluk na pe aw?...

2011 sungah diriam takin ka caan ka hmang ngah titu hi kan um ka zum tuk lo, asinan 2011 kum sungkan ti ngah lo mi le kan hlawhsam mi tete pawl hi tui’ kum kumthar 2012 kum ah sunglawitak PATHIAN in in pekmi sungih kan hlawhtlinnak ah cang thluh hram seh law. Kan minung pi le midang innsang le mi Kawhhran, Fellowship zuam lo in kanmah le mah kan zuam aw thlang pei, 2011 ih kanmah le 2012 ih kanmah kha kan zuam aw ding. Mi kan zuam ih mi Kawhhran kan zuam pang a si ahcun kan cak deuh ih kan thei awk tikah mi kan nautat pang ṭheu ih, cun mi kan bang lo tikah kan riah a sia lala thei. Mi nautat le mihuat le pawrhawk hi cu lusfar lungput daan a siih satan thang sungih kan awhawk lonak dingah mi zuam lo in keimah le keimah ka zuam aw thlang ding a si. Cumi si Paul in a hmai lam thil um mi hi a dawh in ka dawh ih ka ban rero a ti vekin 2011 sungih kan tuah ngah lo mi tete pawl hi 2012 sungah tuahsuak theinak thazangthar PATHIAN in lo pe hram seh law.....   

2... Kum 2012 sungah ziangtin caan hman na tum? ... 2012 sungah ziang tuah na tum? ... Kum 2012 sung na lamzin tluan feh dan ding na timtuah zo maw? ... Tusun kumthar duh umtak in petu kan PATHIAN hmin ka thangṭhat a si. Na piang thar hrih lo a si ahcun na pianthar kum si hram seh... na rawngbawl tambik kum si hram seh... na dam ṭhatbik kum si hram seh... na lungawi kum si hram seh... na duh bik mi na co kum si hram seh... Mi bawmtu kan si thei lo hman ah mi hrang hnaihnawktu le mi dotu kan si lonak dingah Pathian hnenah thazaang thar la in kan nun rem ṭha saal cio uhsi! mi hrang malsawm nu le pa va si vivo hram aw... leitlun kan damlai ih a rawng kan bawlnak pawl le a ram hrangih kan ti thei tawk te kan ṭan laknak pawl hmuahhmuah hi PATHIAN in in hminsin sak thluh a si....(Malakhi 3:16).

Tui tum Meifar siar tu nan zaten PATHIAN in malza tin tiuan in mal za lo sawm hram seh law.
....................
 

Thah Ding Ih Daan Tatawknak Cu Sual A si!

By: Salai Ukte

Thah dingih daan tatnak ‘death penalty’ hi ram tampi ah sekhaazet ih hman rero a si. A duh lotu ram `hen pawl cun damsung thawngthlak ti’n an ṭhum. Damsung thawnginn sungih um khal thah dingih dantatnak thawn thu hmunkhat a si. Theicing in nitin kum 50-60 sung an thi cuahco tinak a si thotho. Nunnak lak tiang cawhkuannak pekawk hi hremawknak menmen cu a si hrimhrim lo. Nunak cu Laksawng bangih pek a theih lo ruangah nunnak laksakawk ding cu thil dik a si lo.

Mi pakhat in pakhat a thah tikah khawtlang cun a thattu kha a nunnak lak sak ve dingah thuthluknak a tuah ṭheu. Kan thlir thiam maw? Mi thah cu sual rori a si ruangah mi thattu khawtlang (society) khal a misual mawh nei a si ve thotho ding. Tathimnakah, Mawh nei lo, pakhat cu mi pakhat in a that ta riai. A pawituk aw! tingaihnak a um nawn fawn lo! A thattu thah ti lo bak lamzin dang a um nawn lo, kan ti pang maw? Sikhalsehla a thattu kan thah tikah a thah mi pa kha a nung saal thei ding a si ahcun thah man um zia nei ngaingai a si ding. Asinan cuvek in a cang thei fawn lo.

Kum tin thawnginn tum sinsin in kan sak. Rorelnak fek sinsin, hremnak khal nasa sinsin in kan tuah asinan thawngtla an dem deuh cuang maw… thahawk a dem deuh cuang ti a um ngaingai maw? Minung nun thlengnak hi hremawknak le thahawknak a si ngaingai maw ti khal ruah sawn dingih thupi pakhat a si. Hih ca siartu lakah mi tam sawn cun “death penalty” pek lung- kimpi hrimhrim ding, cule mi that an dem deuh ding tiah nan ruat cio ding ka zum. Asinan kan pa Moses san ihsin ‘Eyes for eyes’ tiih kan leitlun kan feh vivo ahcun daihnak le remnak ngaingai a thleng dah ding ka zum hrimhrim lo a si. Death penalty (Tii-daan) hmannak ram ah misual an mal cuang maw ti khal ruah tlakzetmi a si.
------------

 Herliam Maw Kum le Caan
 

By: Pi Hrang Tin Sung

Zing eng mawi in leitlun a run sun,
Zaihla mawi thawn van va in an awi;
Pangpar in an par mawi pharh in sunlawihnak an pe,
Zilthli neemte’n a hrang;
Thinghnah hring tla lungawi in an lam.

Christmas caan sunglawi a hung thleng,
Zumtu a mi le fa tla cun;
Kan neih Ro bawm le thinlung sangka ong in,
Hnipuan mankhung le thilthuam ṭha thawn;
Naute suak thar lawm in  Biakinn kan pan,
Ruundamtu suah caan kan hmangliam.

Aliam aliam aliam vivo...,
Liam hrih hlah law kum le caan aw;
Ka lungthlitum a kim thei hrih lo tiin,
Lungkuai in hruum rero hman sehla;
Kir zai a rel duh nawm si lo,
Siang lo cingten mual in liam san.

Hmanseh sersiamtu’n rem a ruat,
Leitlun nomcennak ih hlohral in siang lo;
Thlawsuah malsawm donnak caan in pe,
Kumthar engmawi a parter;
Kan hrang caan sunglawi ti theithiam in,
Zawn in ruattu Cung Mang Bawi Thangṭhat cio uh si.

=================

Thlirlet saalnak   

   By: Paatee 

Pathian zangfahnak in kumpi kumkhat cu kan hmangliam lala thei hi a ropi in a sunglawi. A liam cia caan ih kan tuah/ṭuan mi pawl hmuahhmuan thlirlet saal cu a awl lo tla a si men ding. Asinan kum 2011 sungih kan tuah/ṭuan mi pawl, ani/thla in kan thlirlet saal thei lo hmanah kumkhat sung kan tuah/ṭuan mi pawl ti zawng talin zohlet awsaal cio thei sehla.

Pathian rawngbawltu pawl in teh kan rawngbawlnak ah Pathian duhzawng in maw, kanmai’ duhdaan zawngin a rawng kan bawl tam deuh? Kawhhran le mipi hrang hnaṭuantu pawl in teh mah duhdaan zawng in maw, mipi duhdaan zawng in kan tuah/ṭuan tam deuh? Mai’ ṭanghma sial in teh kan cangvai tam deuh pang maw! kan caan hman daan hi rei lo te tal vun ruat aw saal cio thei sehla!

Kumkhat sungih kan tuah/ṭuanmi le kan um daan pawl hi thilri bangin tham theih le hmuh theih cu si theh hai sehla, kan tuah/ṭuan/um daan pawl ah A ṭha/Mawi lo/Mi hmai ih suahpi ngam lo pawl an si culci ding, a zum um! ...  Kan thlirlet awsaal tikah mahlam ih ruahdaan/hmuhdaan le pom daan lawngin thlir awlo in mi ih ruahdaan/hmuhdaan ding le pomdaan ding lam khal in thlirlet aw thiam sehla, kan tuah/ṭuan mi pawl fiangten kan hmuthiam ding. A ṭhatnak ah neta cun tu hnakih thasin in, Zohmawilo le laktlak lonak ah remṭhat awsaalnak le ṭanlak saalnak ah, Lungtlin lonak ah zuam sinsin ding ah, cutin kan hmailam ih caan kan hmanlai dingmi hrangah kan Lungman khung ah cang hram seh!

Kan pekawnak cio ah teh Satisfy le hnangamnak  kan nei thei taktak maw?

......

Tusun Mino Thaisun Hruaitu

 By: Salai Mazawn
 

Khua pakhat, Kawhhran pakhat ah nauhak an tam asile khua le ram, Kawhhran in ṭhansonak a pan hrelhhro tinak a si. Nauhak an tam le mino an tam ding ti a fiang. Mino an tam le ṭuantu an tam ding, cuih mino cu a hman daan kan thiam asile ram le miphun, Kawhhran kan ṭhangso ngaingai tinak a si. Thil ṭhazet pakhat kan nei nan a hmannak cang kan thiam lo si maw, a hmannak ding kan thei lo a si ahcun ziangvek thil ṭha nei khal sehla thil ṭangkai lo men a si.

Zookhal Pathian in mah le tawkten  ṭangkainak nei in in sersiam. Curuagnah kanmah le ṭangkainak zawnte ah ṭanrual daan, hnaṭuan tlang daan kan thiam ahcun thil fate- zet khal thil tumpi ah kan tuah suak thei. Cucu  Pathian ih thiltum a si. Cuvek thotho in mi pakhat in amai’ ṭangkainak zawn a thei aw lo ahcun ziangtinkim ah buainak thlentertu a si ringring ding. Mi zovek khal mah le dinhmun cio in kan hmaika ah Pathian in ṭuanvo in pe ih mawhphurhnak a ret fingfing. Cumi hmu thiam lotu hrang ahcun hmailam ih kan hmuitin mi cu kan dunglam ah a rak um zo tinak a rak si. Hlawhtlinnak ngaingai a rak um lo. Khawruahnak lawng ih hmuh theimi Pathian in ṭuanvo in pekmi talent cu ṭhangthar mino in kan nolai caan ah kan hmuh thiam a pawi mawh. Talent kan co mi hi Pathian sunlawinak le kan miphun damnak hrang theitawk suahin kan ṭuan a thupi fawn..

Khatlam zawngin kan sim asile kan pu le kan papawl cun kum rei in dampi’n in hruai thei nawn lo tikcu a thlen tikah, kan pu le kan papawl ih kenah thlun in a tlusia mi rem ṭha in, thudik lamzin ih in hruaitu ding cu tuihsun ih minopawl hi an si. Tusun ih mino cu thaisun ah hruaitu a si ding. Cuih mino cun a tikcu a thlenhlan ah fimthiamnak ah siseh, Khawtlang le Kawhhran ah pumpeknak thawn hmuhtheih lo mi tlanzuamawknak ah taimak a suah a ṭul.
.........

 

Kan I.T Hi !

   

Salai Youthlife

Information Teleology (IT) kan ti rero mi hi Kum reipi ihsin rak thok si lo in mani tihnisun ihsin rak thok fang; tuni ih kan hman rero mi a si. Leitlun ih website cakbik le larbikpawl kan zoh asile, kum 17 hnakih upa ngaingai an um hrih lo. Ahliece in ‘Facebook’ le ‘Google’ pawl tla hi kum 7-8 ih upa fangte an si hrih. Internet- website-thuthang site pawl ih rak suahkeh daan kan thlir asile lolam ngaingai, hnisuakza lamlam an si. Asinan, theithiamtu-pawl cun fimvartak in a hman daan an thiam tikah tuni ahcun cathiam, mifimthiam pawl ih pumcawmnak ah a cang suak thei a si.

Kan dunglam kum 20 hrawng ihsin email ID ka nei titu hi kan tam ciamco lo ding. E-mail hmang ih unau sungkhat kan pehtlaihnak cu mani fangte a si kha. Tuisan ahcun phone neih lo, Email account neih lo cu mibang lo tluk ah kan ruat thlang. Mi dangih an tuahmi kan tuah thiam lo le, kan neih ve lo ahcun mi hnufual, mibang lo cazin ih ret kan si ding ruangah santiluan ih in fehpi vekten cangvaih daan kan thiam a ṭul ngaingai a si. Mi’ thiam hnu ah thiamtu si loin midang an thiam hlan ih rak thiamtu si tla a ṭha ngaingai.  Kan kiangkap ih an hman daan le an thiam daan tla zoh thiam in hmuhsuak le zirsuak ding zuam cio uhsi!

------------------------------

Kan Ṭong
By : Rev. Mike Zung Ceu

Laimi cu Laiṭong in biak aw uhsi:...  Mirang cu mirangṭong in, Kawlcu kawlṭong in, Tuluk cu Tulukṭong in, Lai cu Laiṭong in biak ding a si. Laimi tampi in Laiṭong hi Biakinn ṭong tluk ah kan ruat ih biakinn ih Pathian biaknak fangah kan hmang. Biakinn leng kan thlen cun ṭong dang in kan biak aw celcel. Cutincun a ngah lo. Kan tonawknak tinkim ah Laiṭongte'n kan biakawk a ṭul. Culawngah kan ṭong a nung tata ding. Kan ṭong kan zahpi asilole kan uar lo a si ahcun kanmah sungah kan ṭong a thi ta ding...

.................................................

News:



Miss Venezuela pawhte cancer ruangah a thi: 

Ref abc news:

2000 kum ih Miss Venezuela rak ngahtu Eva Ekvall (kum-28) cu pawhte cancer ruangah Dece.17, 2011 ah Houston ah a pasal le a fanu kum hnih mi a tansan a si. 2000 kumah kum 17 mi si in Miss Venezuela a ngah ih 2001 kumah Puerto Rico ah Miss Universe hril awknakah palinak tiang a rak ngah ban ve. Model le zuknung lam khalah hlawhtlinnak tampi a nei ih TV khalah thuphuangtu ah kum reipi ṭuan rerotu a si. A thihhlan ah cancer natnak thawn an buan (tuar) awk thu pawl famkimzet in a ngan man. Ekvall hi a nu Jamaica mi si in a pa hi America mi a si nan Venezuel mi ih ruat awtu khal a si. .



Tuluk mifim kum 7 sung thawngtla ding:

Tuluk Scientist hminthang Huang Kexue cun US company pahnih ih sumdawnnak thuthup a ruk suak ih zum (rinhrel) a si ruangah kum 7 sung thawngtla dingih a tlunah thuṭhensak a si. Huang Kexue cun Dow Agro Sciences in ramsa thahnak tur an tuah daan le Cargill company in ei in ding a tuah daan pawl ru in Chinese University le China ram ih National Natural Science Foundation a pe. Cargill company cun Huang Kexue ih ruk mi hi dollar million 12 man a si tin a phuang. Dow Agro Science cun a thilru mi hi tangka hnak in a man khung sawn tiah a sim ve. Court in kum 25 sung thawngtla dingin a thu a `hensak nan kum 7 sung thawngtla dingin rel saal a si.




 
Lu man Ting nga (Ks. 500,000/-:

Yangon khawpi, Hledan zin tonawknak kiangih mipi cawlhdamnak (rest room) ah December 28, 2011, Tlawngkai nithum ni ih bomb puak ruangah nunau pakhat a thi ih pakhat hliamhma a tuar. Bomb puaktertu pawl hi Thailand le Kawlram ramri hrawngah bomb thuhla zingzoitu an si. Mi pathum kai ngah zo in a dang pakhat kaih ngahnak dingah tangka ting 5 pek a si ding thu palik hotu hnen ihsin theih a siih tu ah an zingzoi rero lai.




Paisa Thleng niam ruangah Chin mi khualtlawng mal vivo:
 
Kum dang ahcun Cristmas boruak a tlen cun sumdawng khualtlawng pawl hi an tamzet ṭheu nan tukum Christmas cu kum dang bangin khualtlawng an tam lo, an mal zet. Tio lam sonak gate (check gate) ih hna a ṭuantu pakhat cun “Sum thleng a niamtuk ruangah si ding khualtlawng khal an mal nasa. Kum dang thawn a bang aw lo” tiah a ti. 



India khawdai ruangah harsatnak le thihnak tiang a thleng:

India ram saklam cu khawdaituk ruangah motor, tlangleng lawng si loin vanzam tiangin buainak an tong. New Delhi khawpi sung khalah khawdaituk le mero tamtuk ruangah tlangleng 100 lenglo cu cawlhter a si ih a dang tlangleng 40 khal zindang zawhter a si. Mero ruangah Indira Gandhi International airport ihsin vanzam suak ding le ṭum ding pawl hrangah harsatnak nasazet in an tong. Khawdaituk ruangah Haryana, Punjab le Chandigarh state pawl ah mi 39 pawl ih nunnak tiang a cem phah thu theih a si.

........... Siartu zate Pathian in lo thluasuah hram seh ...........

 

           DBCF Meifar        

   Tawlreltu:   

      D B C (Youth Wing)

     Since  :  2010    

     Chief Editor       

Thian Za Thang @ Thang Kolh

Join Editor:

Salai Uk Lian @ Ukte 

.....................................................................................................................................................

Christmas Special Issue, 2011

D B C F   MEIFAR

Vol.2, Issue (12)

December 2011

 Special Christmas Issue  

................................

Editor Cafung: 

DBCF Meifar in Naute Suahcam kim lungawinak ah Christmas Cibai kan lo buk a si.... Tuthla December thlasung ahhin veihnih suah beisei a si. Tuṭum DBCF Meifar hi cahram dang zianghman kan tarlang lo... “Special Christmas Issue” in kan suah ih... mimal tin ih irawm suak Christmas kan hmuh daan, kan ruah daan, kan hngakhlap zia le kan hman daan tarlang a si. Himi hrangih Sermon, Cahram le mai irawm suak a ngantu zate parah lungawinak simcawk lo kan nei a si.

..........................................

Jesuh hmin panga

By: Rev. Nehamiah Sui Nei Piang (DBCF Pastor)

Tuṭum 2011 Christmas Issue hrangah Sermon tawite ngannak caan ka ngah ve ruangah lungawinak tampi ka nei. Kan thupi dingah Jesuh hmin panga pawl hi kan zoh tlang pei:...  

Isaiah 9:6:

Kan hnen ah Naute a suak zo.Amah cu in uktu a si ding. 

Amah cu mangbangza, remruattu, a cak mi Pathian, Kumkhua ih Pa,

daihnak Siangpahrang tiah kawh a si ding. 

 

1. Mangbangza: 

Leitlun ih thil um dah lo cu milai zohman amai’ tuahmi ah a cang ti hi a si. Pathian cu a sersiammi minung ah a cang ih Rundamnak in tuah sak. Nunau khal mipa cii tel loin nau an pai thei lo. Merry cu mipa cii tel riai loin nau a pai. Leitlun biaknak dang hmuahhmuah cu an pathian ah can an tum cio. Kanni Khristian pawl cu kan biakmi kan Pathian sawn minung ah a cang. Hihi biaknak dang thawn kan danglamnak cu a si. Profet Isaiah in a hmin ah Mangbangza Pathian a tinak khal a si ding ka zum. Pathian hriakthih David khalin Goliat cu lungto te in a neh mai. Hikhal hi mangbangza Pathian a sinak langtertu a si. Leitlun sa- khua dang pawl hi an pathian ni le puai an tuah tikah misual zovek khal in felfaitak in an um ih, an lawm cio. Kan ni zumtu u le nau, kan lawm mi Naute hi ruah ṭhat a ṭul. Mangbangza Naute cu a si. Zu le sa nomceennak men ih lawm ding Naute a si lo ti ka sim duh. Zumtu nitin kan nunnak ah mangbangza Pathian a sinak hi kan parah a lang cio dingkhal ka zum a si.
2. Remruattu:

David cu hriam naam zianghman a nei lo na’n, remruattu Pathian in rem a ruat sak ih Goliat neh thei mai. Zumtu unau leitlun kan damlai caan tawite ahhin kan `ulmi pawl Pathian in in remruah sak `heu a si. Kan neih lo, mangbang ih kan um caan le kan tlaksam caan ah remruattu Pathian hi kan sawm cio pei.
3. A cakmi Pathian:

Filistin pathian hnakin kan Pathian a cah zia David ih nun ah kan hmu thei. Leitlun pathian hmuahhmuah hnakin kan Pathian a cakbik. Goliat mi cak cu Pathian cahnak a rinsantu David in olsamte in a neh mai. Kan mangbang, harsatnak, kan buainak tum taktak pawl le kan tuah dingmi pawl hi a cakbik Pathian cahnak thawi kan do ih kan rinsan thiam cun, Amah in in nehsak ṭheu a si. 

4. Kumkhua Pa: 

Leilung tlun ih in hringtu kan nu le kan pa cu a reihlan ah kan ṭahnak ah an cang in mual in liamsan mai ṭheu. Filistin pawl rinsan mi micak huaisen Goliat cu rei a daih lo, a thi mai. kanmah Christian Pathian lawng hi kumkhua rinsantlak Pathian a si. Kumkhua nunnak in pe theitu umsun khal a si. ...        


5. Daihnak Siangpahrang: 

Kan ram, innsang, Kawhhran, daihnak le remnak a um theinak dingah Jesuh hi a thupibik a si. Jesuh in Cross parah satan ral a neh ih zumtu pawl in lungdaih hnangamnak kan nei thei. Leitlun ih pek thei lo mi hnangam daihnak cu Jesuh lawngah kan co thei. Jesuh lo cun leitlun ah daihnak tak a um thei lo. Nan hnenah hnangam daihnak ka lo taanta, Keimai’ hnangamnak ka lo pek a si. Leilung mi ih pek vekin ka lo pek a si lo. Thinhar le vansang in um hlah uh. Nan thin khal phang hlah uh. tiin John 14:27 ah Jesuh in thu in taanta a si. ... Tukum 2011, December 25 Jesuh suah Ni cu Amah Pathian duhzawngin lungawi sopar ten kan lawm tlang pei. Pathian in hnangam daihnak nan zate parah lo pe cio hram seh.

 ............

RUALDUH RUATHNIK LAW!

By: Pi Hrang Tin Sung (DBCF Nubu President)

 

Liamcia caan ih kan tuah kan ṭuan
kan cangvaihnak,
Kan mi kan zia langfiang tertu;
Tesinfa ih an rel dingmi,
Kan thuanthu...

A ralai ding kan hmailam caan,
Khui zin zawh in ziang dinhmun ah
ziang kan cang ding;
Theih cia um lo,
Thuthup hlir...

Kan hrang ṭhabik tu'ih kan nunnak,
Duhbang hman theih;
Sunglawi caan ṭha,
Zangfahnak laksawng kan dong cio.

Rualduh ruat hnik law,
Cuih caan tawite;
Na hman daan ziangvek a si?
...........................

An Palh Pang Ruangah

By: Rev. Run Cung Mang (Senior Pastor, LCF Malaysia)

Thil tipalh (mistake) timi hi mikip: mi-aa te ihsin mifimbik, mi nauta ihsin mi maksak le mi upa nunnak khal ah a cang thei ṭheumi a si. Mah bulpak nunnak, Kawhhran, Fellowship le Convention ihsin thokin miphun huap tiang mi pakhat, hruaitu pakhat in thu a ruat palh, a ṭong palh, ca a ngan palh, thu a zirh palh, thil a tuah palh pang asile buainak a suahpi thei. Curuangah raalrinzet a ṭul. Ṭuanvo fate nei khal in amah le tawkte’n raalrin a thiam a ṭul ih hruaitu sinsin cun nasazet ih raalrin a ṭul.

Matt. 2:1-12 sungah Nisuahnaklam mifim pathum ih thuanthu kan hmu. Ni le Thlapi, Arsi zoh thiam, mifim le milian, mi maksak an si ti cu Khrismas neitu naute Jesuh an ton tikih an pekmi laksawng zoh in theih thei a si. Khrismas Caan ah mifim pawl nun ihsin kan zir dingmi cu Rundamtu siangpahrang tong ngah ding rori ih an hawl le laksawng an kenmi hi a si. Asinan riahsiatza ngaingai a simi cu mifim pawl ih thil tipalhmi hi a si. Ziangso an palh? Lamzin an palh. A thokpek ih an hmuhmi Arsi thlun ringring loin anmai’ ruahnak hmangin an feh. Tusan mifimthiam hruaitu tla Bible le Thlarau Thianghlim ih hruainak hnakin, mai’ fimthiamnak rinsan in thiltuah an hman ruangah buainak an suahpi ṭheu. Mifim pawl in Jesuh an ton hnu an nun daan lamzin a danglam vekin kannih tla!

Mifim pathum in Van Arsi an thlun lo ruangah Bethlehem pan loin Jerusalem an pan, an palh pang. Mifim pawl ih tipalhmi ruangah Herod siangpahrang le Jerusalem khuasung mi thinhar in an um. Culawng si loin nauhak kumhnih tang tampi ih nunnak a hlo. A va poi ve. Mifim ih thil tipalhmi hi! Mi nauta ih tipalhmi in mi a siatsuah thei ko nain mifim ih tipalhmi cun ram le miphunpi tiang a siatsuah thei. ṭih a nungtuk.
.....

Pu Kap Sang (DBCF Rawngbawltu)

Christmas Ka Ngaih Daan

December 25 hi Christmas dik cu a si lo.... Mi ṭhenkhat cun Christmas hi December 25 a si ngaingai hmang kan ti. Jesuh Khrih ih thawhsaal nun nei lotu cu Christmas a hmang hrih lo.

Khristmas thei lo pawl cun Voksa, Cawsa le Arsa pawl in an hmang ciamco. A poi ka va te em!...  Kumkhat veikhat lawng Khristmas an hmang ṭheu ding tinak a si cu!  A va poi em ve aw....

Kumtin Christmas kan hmang. Sumpai tampi pi kan cem ṭheu. Na piangthar lo a si ahcun, Jesuh ruangah Pathian thawn nan rem-awk lo a si ahcun, Caw, Vok in Christmas na hmang men, Na piangthar a si ahcun Chritmas tak cu nitin na hmang ringring ti rak thei aw...
.........................................

Nu Ro Din Pui @ Puite  (DBCF Nubu Secretary)

In rundamtu Jesuh suahcam lawmnak Ni ih kan hman mi Christmas Ni hi zo cio khal in nuamtak ih hman ding duh in kan tim tuah cio ding ka zum. 

Kei ka diriamnak ve bik cu Jesuh suahcam lawmnak hla hi zanvar in biak inn ah lengkhawm in sak dutdo sehla ka diriam bik… Asinan kan umnak khua le ram ahcun cuvek cu a ngah lo…. Asinan a poi ka ti ve mi pakhat cu mipi tam sawn hi ruai theh caan ahcun kan ra thei ih... rawl kan ei thehah kan tlung thehih khawm caan ahcun mi malte lawng biakinn ah kan taang  ṭheu hi a poi ka ti. Ruai `heh caan ih kan tam vek in khawm caan khal ah tam sehla ziangtluk in kan Bawipa Jesuh a sunglawi ding....

...................

Jesuh Khui ah a suak?  

Jesuh Khui ah a suak lo?

Rev/ Mike Zung Ceu  (FBC,Yangonm, Senior Pastor) 

Bawi Jesuh khui ah a suak ti sehla cawrawl einak kuang sungah asilole caw-inn ah  kan ti ding. Khui ah a suak lo ti sehla inn sungah kan ti ding. Luka in thuthang`ha a ngan tikah "Inn" timi ṭongfang a ngan tikah Greek ṭongfang phunhnih a hmang. Josep le Mary in nau neihnak ding inn an hawlnak thu a ngan tikah le Bawi Jesuh le dungthluntu pawl netabik zaanriah an einak ding 'Inn' thu a ngan tikah, "Kataluma" timi cafang a hmang ih Samaria pa in mina a hei retnak 'Inn' thu a ngan tikah "pandocheion" timi ṭongfang a hmang tiah an ti.

"Kataluma" ih sullam cu "luater/thlah" (to loosen/untie) ti a siih, "Pandocheion" cu "mizate cohlang thluh" (to receive all) tinak a si. Kum zabi pakhat lai ih Judah pawl ih innpi le caw-inn an sak daan hi ziangvek a si pei? Kannih Kawlram mi pawl vekin inn a dangte, inn ihsin a hlatnak ah caw-inn a dangte ti'n an sak pei maw? Caw-inn ah Jesuh a suak kan ti tikah inn thawn a hlatnak ah an sak mi thlaamte sungih a um mi caw-rawl einak ah a si ding tiah kan mitthlam ah a cuang ṭheu. Bawi Jesuh suah lai ah Bethlehem khua cu khuatumpi si hlah hman sehla, khua thupi le hminthang khua a rak si. Ziangahtile Siang-pahrang David suahnak khua a siih Josep ih suahnak khua khal a si. Cu- ruangah mipum siarnak, milu cazin pek ve dingin Josep te nupa cu Bethlehem khua ih an va tlunnak a si. 1900 kum ah Bethlehem khua ah mipum 4,000 lai an um ih 2007 ahcun mipum 40,000 lai an um ti a si. Laitlang thawn tahthim ahcun khua fate cu a si lem lo.

Bawi Jesuh ih rak suahnak Bethle- hem khuate cu tuini tiang buaipi zet mi a si rero ko. Kan Bawipa Jesuh rak suahnak caw-inn hminsinnak ih an sak mi Biakinn tla buaihnawh mi le thahawknak hmun pakhat ah a cang. Bawi Jesuh ih rak suahnak Caw-inn taktak cu ziangvek a rak si ti theih har si hmansela, " Jesuh a suak " timi cu a fiangmi a si. Baibal in, " THU cu MINUNG ah a rung cang" tiah a ti (Jn.1:4). Curuangah Vancungmi pawl in, " Pathian cu a sangbik van ah thangthat si ko seh" tiah thangthat hla an sak (Lk. 2:14).

Rev. Alida Ward (The Greenfield Hill Congregational Church) in Dec.25 ni ih sair dingmi cahmai ah: "Christmas Ni ah khui ah na um?... Mileng khaan ah na duhmi te thawn maw? Rualpi pawl thawn maw? Silole na rualpi inn ah maw? Hotel sungah maw? Silole khual lam ah maw na si?..tiah a ngan. A singai US ahcun Khrismas ni ngaingai ah kawlram lam vekin puai tuah le biak- khawm ciamco a um lo. Mah le innsang le rualpi pawl tongkhawm aw in mah le remcan caan le ni ah hlasaknak, ei-in tlangnak le nunnomnak in an hmang. Ka hnen ah Khrismas sawmnak ca pakhat a ra thleng. December 9,2011 ih tuah dingmi a si. Hitin thulu an ngan: " You are invited to Traditional A Merican Christmas Party. " (American phunglam ih tuahmi Khrismas ei-in nunnom tlangnak ah ra tel ding in kan lo sawm).

Bawi Jesuh naute, leitlun a rungtum lai ah riahnak inn a rak co lo. Mifim pawl in a um ding tiah an hawlnak siangpa-hrang inn khal ah a suak cuang lo.Tuini ah teh kan leilungpi ah mi paziat hnen ah riahnak a tong pei? Khrismas puai a hmang rerotu pawl thinlung sung ah teh hmun a co ngaingai pei maw? Kum 2000 lenglo lai ih a rak suaktu Jesuh kha nunphung pakhat vek le tuahkeel daan pakhat vekin a suahnak thuanthu sim nolh aw saal rero men in, ei-in thawh-thaw eitlang in le hla sullam ruat thuk cuca lemlo in Khrismas carol hla sak rero men in kan lung a kim tawk ding maw? Na sung ah Jesuh hmun a luah ngaingai zo maw? Na nun a lo uk taktak zo maw? A thuneihnak tangah na nung taktak zo maw? In umpitu "Immanuel Pathian" a sinak tepngah in hnangam lungawinak na co ngah ngaingai zo maw? Bethlehem khua ih inn neitu pa, Jesuh tlunnak dingah innkhaan a rak pelotu pa vekin Jesuh ih suah lonak "Inn" vek kan si pang maw? Naute Jesuh in a suahnak dingah a hril lomi Herod Siangpahrang inn vek teh kan si pang maw? Jesuh suahnak maw na si?..silole...A suahlonak sawn?...

................................

Christmas hman daan ding

Salai Cho Mana
(Malaysia, Restaurant ih hnatuan rero)

....kan hna ṭuannak hi Christian an si lo ruangah Christmas ni cawl ding in siang lo... December 25 ih zumtu sungkhat unau pawl hnenah ka tel thei ve lo ding tih ka ruat tikah lei tisa lam in ka ruah tikah ka riah sia ngaingai.  Malaysia ka rak thlen pek kan dung kum 2010 ah Social lam (commnunity ...etc...) lam caan ka pe deuh ruangah ka hnaṭuan ka pelh a tam. Curuangah ni kum Christmas ah tla ka boss nih caan in pe duh lo ruangah hnaṭuan ihsin ka suak cih... asinan thlacam nak thawn  thinlung lam timtuahnak cu ka nei nasa...

 ............................

 Salai Mazawn (DBCF Mino)

Suahcam Hmangtu (Mark 6;21-29)

Bible sungih suahcam hmangtu kan hmuh mi cu Herod Antipas ih suahcam a si. Herod Antipas in a suahcam ah Herodias ih fanu hnenah a dil mimi pe dingin a tiamkam. Hi suahcam an hman tikcu le caan ih thilthleng mi pathum:

1. Herodias in a fanu hnenah Baptisma petu John ih lu dil ding ah a fial.
2. Herodias fanu cun Baptisma petu John ih lu a dil.
3. Herod in amai’ suahcam rori ah John ih lu cu a tan.

Hitei’ pathum ih suahcam hman daan hi a rapthlak in a fihnung um. Minunnak siatsuahtu an si. Rundamtu Jesuh ih suahcam ah mi riahsiatnak, buainak thlentu, thil ṭha lo mi fawrhtu le fihnungza ih hmangtu kan si ahcun kan hrangah a poizet ding. Kan tuhmi cii bangin kan aat leh saal ding.

..........................................

Ma Pek (DBCF Mino)

Rundamtu Jesuh Khrih, Naute ih suah ni tak hi Bible ah ngan in um lo hman sehla, “CHRISTMAS” tihmi in leitlun ih miphun dangdang thinlung sungih hmual a neih daan hi mak ka ti nasa. MANGBANGZA PATHIAN a sinak fiangtertu pakhat a si in ka hmu.  

 ....................................

 Esther Huaino
(Kota ih hna ṭan phah  Speaking zir phah rero lai, DBCF Mino)

Christmas caan hi ka hrangah a sunglawi hleice ih ka hngakhlap zet. Sunglawizet ih hmang thei dingin thinlung lam timtuahnak thawn... Ahleice in... thlacamnak thawn Pathian hnenah ka hlanaw  rero. 

..............................

Naute Jesuh hrang hminsin tlak thil tampi sung ihsin pakhat

Upa Lal Biak Khum (Borkenes,Norway)

Siartu zate, Christmas cibai ka lo buk. Lungawi soparten Christmas nan hmantlan khal ka beisei. Christmas thuthawn pehpar aw in thu mallai kan ruattlang pei.

Tuukhaltu pawl Mission (Lk 2:10-19).

Tuukhal pawl hnenih Thuthangṭha thlen daan hi cu a danglam deuh. Ziangruangah tile tuukhal pawl hi hramlak ih um ringring ṭheu an si ruangah an theihnak khal a mal deuh a si men thei. Curuangah midang hnakin Jesuh pian daan, umnak pawl le a itnak ding tiang in fiangzet ih sim an sinak a si. Cuvek ṭhiamṭhiam in, kan fimnak le thiamnak in rual a baan lo hmanah, kan theihthiam ding rori in thuthang`ha cu sim kan si. Tuukhaltu pawl cun thil`ha le robawm on ding an nei ve lo nan, an Mission an fiang nasa. An tuu pawl ziang an rak caang ding tilam hnakcun, naute Jesuh cibai buk ding ih feh kha a si.

Midang vekin sum le saw/ro ṭha kan nei lo a si hmanah, kan tikcu le caan a mai’ hrangih kan hman ih, fehsan ṭul a um khale, ralṭha tak ih kan fehsan ih amah sunlawih thangṭhatnak pek hmaisak hi kan ti ding khal a si ve. Jesuh thangṭhat sunlawih sirawtu an um dah lo. Cuhnu ah tuukhal pawl cu an tlung kir saal ih, an tuu pawl zuva in an rak dehsak ti kan thei lo. Bawipa hi sunlawih thangṭhatnak pe hmaisa phot mei sela, kilsak ṭul ringring kan ziangkim hi, Amah in himdamten in rak kilkhawisak mei. Ziangruangah tile, zumnak khal tuahnak a tel lo ahcun cui zumnak cu  thi a si.

“...Na rel vekin ka par ah thleng seh.” kan ti theinak dingah le a tak ih kan tuah rori theinak dingah thuthangṭha rak siartu hmuahhmuah hnenah, Thlarau Thianghlim bawmnak le umpinak nan parah atu le kumkhua in hmun camcin hram seh.
...................................

Salai Cung Nawl Thawng

(Korea ih Ph.D zirlai)

.... in Rundamtu Bawi Khrih suah cam kan thleng saal lala ih ka lung awi tuk. Bawipa ka thang`hat ti lo cu sim ding dang ka thei nawn lo. 

Culawng si loin  Christmas caan ih ka rualpi le pawl ka  tong ding caan ruat in hni suamso ten nitin ka um ring ring

 .......................................................

Salai Thian Lian Thang @ Thianpi
(DBCF Mino)

X’mas ka hmuh daan cu, Lunglennak le lungawinak in ka hmu….  A hlaan ah innsungsang kimten hmunkhat, innsang khat, khawkhat ah sungkuaruun zaten thatho, nuamzet in le lungawi nak thawn phurzet in hmang kan rak um cio. Tu can Christmas Ni sunglawi ahcun mah le umnak cio in lungawi in le lungleng mitthli thawn kan rawn hmang……….. Unau nangteh Christmas ziangtin na rak hmang.?
.................................................................................... 

Henery Hrang Kap Hlir @ MaMa
(DBCF Mino)


Leitlun ih mi hmuah hmuah sualnak ruangih thi ding  runtu dingah Pathian in a Fapa neihsun kan hrang ui lo ih in pek. A sunglawi tuk aw... Tu ah kan Bawi Jesuh minung vekin kan lakih a piancam kan thleng lala... hitivek ih piancam hmang saal thei dingin in hruai thlengtu kan Pathian cu mi phunkim ih thangthat in um ko seh …. A men……

...........................................................................................

 Hming Than Zau @ Zaute
(DBCF Mino)

Jesuh Suahcam kan thleng leh saal zo...

Daizirziar te thawn kan ni-khua... 

Hnipuan thar mawite thawn.....

Kei ka thin lung... 

Bethlehem ah hnopuan thar si lo....
Naute thawn  ka si………

 ...................................................................................................................................................

   siartu zate parah lungawinak simcawk lo kan nei... 

                                                      

DBCF Meifar November Issue... 2011

D B C F  MEIFAR

Vol 2, Issue (11)

 Christmas Sullam

Rev. Dr. CJ Hrang Hmung

Christmas ih sullam a thei lotu kan um tuk lem nawn lo ding tiah ka ruat. Ziangahtile Khristian kan sinak khal kum reipi a si zo ih Christmas kan hmannak khal kum tampi a si zo. “Christmas” timi cu “Christ” le “Mas” timi ṭongfang pahnih kommi a si. “Christ” timi cu “Khrih” tinak a siih, “Mas” timi cu “mass” timi Latin ṭongin a ra ih a sullam cu “a bur, a hlom, pumkhawm" tinak a si. Curuangah ‘Christ’ le ‘mass’ kan kom ih “Christmas” tiah kan ko ih a sullam cu “Jesuh Khrih suahnak thawn a pehpar aw mi mibur, pumkhawm" tinak a si. “Christmas” timi ṭongfang ih cafang pakhat ciar khalin sullam pakhat ciar an nei ve. An sullam pawl cu a tanglam bangin kan langter hnik ding...

 C   -    Christ          - Khrih Jesuh
 H   -    Herod          - Herod siangpahrang
 R    -    Redeemer  - Sualnak ihsin tlentu,

  I    -    Israel           - Israel miphun
 S    -     Savior        - Rundamtu
 T     -     Trust         - Zumnak
 M    -    Manger      - Caw rawl peknak kuang
 A     -    Angel         - Vancung mi
 S     -    Shepherd  - Tuukhaal

Hi a tlunih cafang pakhat ciar ih sullam pawl kan komkhawm asile “Khrih Jesuh cu Herod siangpahrang san ah sualnak ihsin tlentu, luattertu dingah Israel miphun sinak lakin caw rawl peknak kuang sungah a suak. Amah a zumtu pawl rundamtu a siih vancung mi le tuukhaal pawl khalin an biak” timi sullam ah a suak.

Christmas kan hman daan:

Zumtu tampi cun Christmas hi hnipuan mawi le ṭha hruk caan le nomnak a phunphun in kan rak hmang. Cule sumdawngnak le hlawknak ah kan hmang.  Midang ram tampi le zum lotu pawl hmanin mi hmuah in lei thei hai seh tiah an thilri zuarmi an ṭhum na’n kannih cun sum kan dawngnak ah kan hmang... Nang le kei misual pawl rundam dingih a rung suaktu Jesuh Khrih ih lungawi zawng a si pei maw? A duhmi teh a si pei maw? Suahni lawmnak kan hmang rero nan suah ni neitu ih lungawi lo zawngin Christmas kan hmang pang maw? Ruat ṭha sal kan qul ngaingai.  

DBCF MEIFAR

November 2010

Editor Cafung

Rundamtu Naute Suahcam...

* Ziangtin kan hmuak ding?

* Zu le sa nom-ceenak in maw?

* Hnipuan thar in maw?

* Thlacamnak in maw?

Kan thinlung timtuah thlang pei uh!

* * * 

THLARAU THIANGHLIM

Rev. Nehemiah Sui Nei Piang (DBCF)

Thlarau Thianghlim Co Daan phun (5)

I. Pentecost ni ih Jesuh Dungthluntu pawl Thlarau thiang hlim co daan. Jerusalem ah minung 120 rual in van ihsin Thlarau Thinghlim thleng ding cu an hngak ih hih 120 lak khalah Dungthluntu pahnih khal an tel ve (Act.1:8). Hi pawl hi van ihsin Thlarau Thianghlim direct ih cotu pawl an si. John 14:16-17 sungah Thlarau cu thlangamtu a siih kumkhua ih kan hnen um ding a si. Pentecost ni ihsin thawk Thlarau thianghlim in leilungtlun zumtu pawl a um cilh hai a si. Cule Meisa lei vek cu an zate parah a rung fu. Judah ruah daan ahcun meisa cun thil pahnih a hmuh sak. (1) Kholhfainak le (2) Pathian um pitnak a siih Israel pawl ramcar ih Meisa-ding khal in Pathian umpitnak a rak hmuh sak.

II. Judah pawl co daan (Act.2:38)

 Sualsirnak le Jesuh Khrih hmin in Thlarau Thianghlim an co a si.

III. Samaria khua pawl co daan. (Act.  8:14-17)

 Piter le Johan in an lu parah an kut an suang ih Thlarau Thianghlim an co.

IV. Ephesa khua pawl ih codan. (Act. 19:1-7)

 Jesuh hmin in Baptisma an lak hnu ah Paul in an lu parah a kut a suang ih Thlarau thinghlim an co.

V. Zential pawl codan. (Act.10:44)

 Piter thusim ngai ih a zumtu hmuah hmuah in Thlarau Thianghlim an co. Tu san kannih khal Jesuh Khrih rundamnak theifiang ih kan pianthar veten Thlarau Thianghlim kan co a si (Efisa 1:13).

II. THLARAU THIANGHLIM KHATTU PAWL NUN DAAN

Bezael cu Thlarau Thianghlim ih a khat veten Biakbuk hrang ih a tulmi pawl tuah a thiam (Exo.31:3-5, 35:31). Othenial cu Thlarau Thianghlim in khat ih ram-uk a thiam. Judg. 3:10-11. Samson cu Thlarau thianghlim in a khat ih a cak. Judg. 14:5-6, 15:14. John cu a nui’ Pumsung a umlai ihsin Thlarau Thing hlim in a khat (Lk.1:15).   

Elizabeth cu Thlarau Thianghlim in a khat ih Mary ih dinhmun a theihpi (Lk. 1:41). Paul cu Thlarau Thianghlim in a khat ih Elimas mit a cawter (Act.13:9-11). Zumtu hmaisa pawl cu Tharau Thianghlim in an khat ih ralthazet in thu an sim (Act.4:31).

Efisa 5:18 ah Thlarau Thianghlim khat dingin in fial. Thlarau Thianghlim hi leitlun minung hrangih a thupibik mi a si. Sual thu khalah Thlarau Thianghlim theihter ngaingai lo cun ka sual a si ti kan thei ngaingai lo. Rundam kan si ti theih fiangnak khalah Thlarau Thianghlim theihternak ngaingai lo cun um zia kan nei thei lo. Christian nun khalah Thlarau nun tel lo cun um zia nei lo kan si. Kawhhran khal Thlarau Thianghlim kaih hruainak lo cun kan member mipi pawl hi Hremhmun sangkaa ih hruaitu si a awlte. Curuangah Thlarau mi ih hnatuannak le tisami mi piangthar pawl ih danglamnak malte kan zoh ta pei.

Thlarau mi: (a) Pathian lam thil a ngaina (Rm.8:5), (b) Pathian lungawi zawng an hawl. (Gal.1:10),  (c) An hnatuan mi ah Pathian hnenah sunloihnak an pe (IIKor.12:6; IKor 10:3)  (d) Thiltha a tuah mi ah Pathian a thangthat. (Phil.1:9-10;4:3)

Tisa mi: (a) Leitlun thil ah an ngai na (Rm.8:5), (b) Minung lungawi zawng an hawl (John 12:43). (c) An thiltuah mi ah minung lawm an beisei (John 12:42). (d) Thiltha a tuahmi ah a thei ring ring ih a hminsin (Luke 18:9).  

Malakhi 3:16, Lei thlun ih Pathain hrang kan hnatuan mi hmuah hmuah cu amah Pathian in a cabu sungah in khumsak a si.

* * *

* * * 

Santhar Israel din daan.

Part II. 

Theodor Herzl ih Thu 

(1860-1904)

Dr. Run Bik

Kum 1800 hrawng tiang ih Israel ram um daan kan ngan zo ih, tu cu santhar Israel dintu pa Theodor Herzl (1860-1904) ih thu ka run ngan ding. Ani hi Hungary khawpi Budapet khua ah 1860 ah a suak. A nu le a pa khal mi nung thei an siih. Juda mi ti aw fekfek an si na’n sakhualam ngaihsak lemlo an si. Herzl hi ca a thiam thei zet ih, 1878 ah Vienna University ihsin Ph.D a ngah. Cuih hnu ah France ram Paris khawpi ah thuthangca ih thuthang latu hna a tuan. Tawkfang tiang cu Herzl hin a miphun thuhla lam a ruat tuk lemlo. A thinlung a thlengtu cu 1894 kum France ram ih thil thlng ihsin a si.

France Army ih Captain hnatuan France Juda mi Alfred Drufus cu midang pawl in ram phatsantu ah an puh ta riai. Thuthatei’ a ruattu pawl cun hihi thu dik lo a si ti an thei na’n Dreyfus hi Juda mi a si ruangah reipi tiang cu acozah le court lam khal in thiam lo an can ter. Heilaifang ah France khawpi tampi ah mi tampi cu zinzawh in Juda mi pawl thi hai seh tiin an au phah vek a theih tikah Herzl cun Juda mi pawl hin mai’ ram ti thei dingmi ram an neih lo cun an him dah lo ding ti a thei. Himi hnu cun Herzl hin Juda mi pawl hrangih ram neih theinak ding lawnglawng a ruat thlang. Herzl hin 1896 ah The Jews State ti ca uk a ngan ih, Zionist Novel Old New Land ti’n 1902 ah a ngan. Herzl hlan ah Juda mi pawl hrangah ram neihter ding titu pawl an rak um ko nan an rak hlawhtling dah lo. Cumi pawl  lakih hmin thang pakhat cu Hebat Zion ti hi a siih, annih hin lo neih phah ih Juda mi pawl hrang ram din an rak tum.

Herzl cun World Zionist Organization a din ih, amah cu President ah a tang. First Zionist Congress cu Switzerland ram Basel khua ah 1897 ah an tuah. Amah khal cu khual a tlawng ciam co i, Jerusalem tla a pal. Cule a ram thar din dingah khati lai ih Palestine ram neitu Ottaman Empire ih sultan tla Istanbul ah a tong. German siangpahrang Kaiser William II tla a tong. Tha an rak pe lem lo. Amah rak bomtu bik cu leh hnu ih British Prime Minister rung tuantu Joseph Chamberlain a siih anih cun British pawl ih Africa an ukmi Uganda ram ah Juda ram tuah sehla tiin thu ron a pe. Juda ram hrangah Cyprus tikulh le Sinai ram tla an zoh. Herzl cun Uganda ram i ram thar rak tuah lawk cu a duh nan an hotu pawl in an duh lo. Curuangah 6th Congress ah Uganda cu ruat nawn lo siseh tiin an ti.

Herzl hi a tummi hrangah hna a tuan tam tuk curuangah a harhdamnak khal in a tuar ih, kum note, 44 lawng a si lai ah Pneumonia natnak in Vienna ah 1904 ah a thi. A ruhro hi 1936 ah Jerusalaem ah an la ih, Independence an neih hnu 1949 ah Jerusalem ih Mount Herzl ti hmin an sakmi ah thlaan hnget si dingin an phum ta. Herzl hi The Father of Modern Zionism an ti theu. Israel ram thar dintu ah a cang na’n Juda sakhua cu cutluk in a thupi ter lo...

* * *

Kan cung i thil a thlengmi hi 

kanmah ruangah maw Amahte in? 

(Gen 1:31, Salm 24:1)

Pastor Peng Thawng (LCC Asst. Pastor)

A hmaisabik ah “Kancung i thil a thleng mi hi kanmah ruangah maw, amahte in?” ti mi vun tial khawhnak caan akan petu kan Pathian leh DBCF Meifar tuanvo hngeitu dihlak sinah lawmhnak tumpi ka nei. Cun atawi khawhnakte in ka vun langhter lai i;- 

Minungnih nitin kan ton mi thil hi an ni khat cio hna lo i, acheu nih ngeih chiatnak kantong i, acheu nih lung-lawmhnak kan tong. kan tonmi thil hi anni khah khawh dih lo ca ah, zei ruangah dah a si ti cu chim khawh a si lo. Sertu Pathian lawngnih a theihmi thil a si, titu in kan tonmi thil hi ruat hna u sih ti hi Pathian bia nih akan cawnpiak mi cu a si. Minung nih hrial khawh lo in kan tawn mi thil cu “Vanthatnak le Van- chiatnak”, hi an si. Vanthatnak kan timi cu zeidah a si i, Vanchiatnak kan timi hi tah zeidah a si ve? A luan ciami kum 2004 i Indonesia ram le a pawng kam ram hna; Lil a hninh ahkhan minung tingthum leng an thi i, cun 2005 ah India ram le Pakistan ram ah Lil a hnin than i Thawng sawnli hrawng an thi thaan. Cun 2008 ah Kawlram ah “Nagis” thlichia a hrang thaan i Tingkhat lengthi thaan, Mah Lil-hninh ruangah le Thlichia a hraan ruangah a thimi hna hi an van a chiat caah maw a si hnga? Cun mah Lil-hninhnak chung in le Thlichia chung hin a luatmi an um hnga maw? Zeiruangah dah an thih? Zeiruangah dah an luat hnga? Ruah ding tampi kan nei. Nang zeiti’n dah na ruah ve?

“Secular and Super-natural” timi ca-uk tialtu pa F.R. Barry nih cun “Vanthatnak kan timi hi harnak a tong rih lo mi hna cate lawng hi a si,” a ti. F.R. Barry nih cun harnak cu nikhatkhat ahcun an tong ve hrimhrim lai a ti fawn. Cun Religion in Africa timi cabu tialtu pa G. Parrinder nih cun, “Vanthatnak hi minung kan ni ralrinnak chung in le kan tuahsernak chungin a chuakmi thil a si,” a ti ve. A langhter mi cu Pathian nih miung hi a kan ser tikah ruahkhawhnak fimnak le hmuhkhawhnak, theihkhawnak thluak a kan pek a ti. Cu a hmang thiam mi hna ca ahcun vanthatnak an ngei i, a hmangthiam lo mi hna ca ahcun vanchiatnak an hmu khun tiah a ti ve.

The Primal Vision timi cabu a tialtu pa J.V. Taylor nih cun vanchiatnak kan timi hi cu “Pathian laksawng pakhat” a si a ti. A chim duhmi cu vanchiatnak um hlah seh law vanthatnak a um hnga lo, vanthatnak Pathian nih langhter a duh caah vanchiatnak hi a umter tiah a chim. Cun vanchiatnak a um lo ahcun Pathian sermi thil hi a tlamtling hnga lo a ti. African Religions and Phylosophy timi cabu a tialtu pa Herbert Jai Singh nih cun vanchiatnak hi “Kanmah minak ni hna caah Pathian nih a ser rua tiah PiPu hna nih an rak ruah tawn” tiah a ti. A langhter thaanmi cu kanmah minak mihna ca lawng si lo in sermi minung dihlak ca thu a rak si tiah a langhter lengmang thaan.

Vanthatnak ah le vanchiatnak ah keimah ka tonmi thil vun langter ka duh. Mizoram le Kawlram ramri Tuidang khua ah mission rian kan tuan i, cu Tuidang khua cun Lawngtlai lei ah ka rak tlung. Kan tlun lei ahcun kan mawtaw lam thlang ah a tla i, kan hawipa pakhat a thi. Kei cu ka van a tha ka ti i Pathian sin ah lawmhnak bia ka chim. Asina in a thimi kan hawipa ca ahcun vanchiatnak a si. Rak thi ve ning law ka chungkhar nih kan van a chia an ti va hnga. Mah kan tonmi thil ah kan tonmi thil cu an nikhat ko na in kei ka nung i, anih cu a thi. Zeiruangah dah kei ka thih lo i anih a thih ti hi khua voitampi ka ruat lengmang. Asina in ka tlinh lonak a sullam le kan hawipa a thihnak a chan ka hngal kho lo. (Phungchim.3:11) ahcun zeizong vialte hi anmah le an caante a serpiak cio hna ti kan hmuh.

Vanchiatnak le vanthatnak hi Genesis 1 chungah Pathian bia nih fiangte in a kan hmuh sak bantuk in Pathian nih a tha tiah thlachuahnak a pekmi thil an si ti hi a pom daan thiam hna u si law hmailei kan kal lai mi kan lam tluan ah fim a kan chimtu thil a si lai. Pathian nih chia-tha thleidan khawhnak fimnak a kan pekmi hi a hman zia thiam hna usilaw kan lam a tluanglai i thlachuahnak zawng tam deuh kan hmu hna lai. “Pathian i bochanhnak ah luatnak a um i, a nawlbia zulhnak ah thlachuahnak a um” tiah Pathian bia a um bantukin nitin kan nunnak ah kan tuah dingmi kan rian hi philh hna hlah usih.

Cu caah kan cung i thil a thlengmi hi “Kanmah ruang ah a si kho i, amahte zawngin a si kho.” Hmuh khawh lo mi thil chungin a chuakmi an si caah, nitin kan nunnak ah i ralringte in nun thiam kan herh. Hmuh khawh lo mi thil pahnih cungah a kal cuahmahmi kan si caah lamhruaitu Jesuh Khrih kannunnak ah Bawi si ko seh... Ca reltu nan dihlak cungah thlachuahnak um ko seh.... Amen

Hmuh daan ...

By: Rev. Daneil Kap Thuan Thang

(Living Faith Baptist Church, New Delhi)

Himi nan thulu tarmi thuthawn mal te run nganve sehla, “Kan parih thil thlengmi hi kanmai’ ruangah khal a si lo ih amahten a thleng ve hrimhrim khal a si lo. A thlentertu Pathian ruangah a si sawn. Pathian siannak lo le remtinak tel lo in thilzianghman hi a mahten a thleng thei lo. Pathian cu ziangkim tlun ih Thuneitu a si.”... Ka lung a awi.

By: Hau Lian (Atlanta... ex.. DBCF)

Nan thulu tarmi keimai’ theihnak si lo in Kan Baibal sung vekin ...“Kan parih thil thlengmi pawl hi, asia atha in kan Pathian hmin sunlawinak dingih Pathian in a thlenter mi an si.” John 9:3  a bung 9 pum in siar thluh sehla, suahthlak ihsin mitcawpa thu ah nan thulu hi a fiang theh in ka thei... ka lungawi.

By: William Sui:  

...“Kanmah ruangah a thlengmi khal a um, a mahten a thleng mi khal a um thotho ko. Pakhat khat te’n simfiang cu a har deuh men ding.” 

Ca siartu nangteh ziangtin na ruat?

***

Lilawn Hnuai ih Thinglamtah 

Pu Thang Dum

Sagaing lilawn thar cu 2005 kum ah an theh. Sagaing lilawn saklam deuh ah a thar donmi a si. Kalaymyo, Tahaan (Kalay) veng nupinu hnenah hitin thuthang a dong. “Sagaing lilawn thar on puai tuah ni hlan tengteng lilawn tangah Thinglamtah (Cross) va phun aw?” timi thusuak a si. Kei cu nunau ka si ih hlei ah Sumpai nei lo, Kawl tong hman thiam lo ka si. Ziangti’n  so cuvek cu ka tuah thei ding” ka ti tikah, “Nang ih sumpai neih le Kawl tong thiam a tul lo; Kawl tong thiam le sumpai liamtu ding cu na hnenah ka ratter dingih anmah pawl thawn na feh ve ding” i ti.

Lilawn phuanpuai an tuah hlanah Thinglamtah ra phun lo asile nan ram cu hivekin a si ding i tiih hmunrawn kaupi ah phuk rulpi a cuangih thli in a suk a so ah a hran ciammam, cuih rulpi cu an kuur luihlo in ka hmu. Cross na phun ngahsuak asile nan ram cu hivekin a si ding i tiih kawh-tawng lung vek hlir cu hmun rawn kaupi ah a cuang lala ih, par tim tuah zik hlum liailiai lak ahcun, malte partimtuah ih par zo malte te an um ka hmu. Asinan a sullam cu zianghman ka thei cuang lo. Kawl tong thiam ih sumpai liamtu ding cu kan inn ah a r ngaingai ih a feh ding thuhla kan ruat tikah; phmunpi lam le lam hla feh ding kan  si ruangah mawtaw tha deuh hawl kan tum. Asinan thla kan camnak ih thu thleng pakhat cu nan fehnak ding cu Haimual mawtaw Driver cu ricin a si ding” i ti. Mawtaw kan sut ih a remcang ko nan Driver thuthu a siih Driver pa sut hnik uh in rak ti; Driver pa kan va tong ih a rak mawng cu ci lai nan; feh dingah in lungkim pi. Driver thawn kan zaten mi pa(8) kan si. Kalaymyo ihsin kan poksuak ih Sagaing cu tluangten kan thleng.

Lilawn thar thlen zik ah ralkap pawl in in rak check nan zianghman kan ken lo ruangah Lilawn kiangtiang kan feh. Thinglamtah (cross) kan kenmi cu Lilawn thuai tidai tai tiang hrawngah; ka tha neih tawk suah in ka nam pil hnu ah; pacang pawlin lungtum in an khenbet ih hngetzet maw tiin thlacamnak kan neih hnu ah ti kan bual ih kan bual-awk thluh hnu ah tlun zin kan zawh saal. Kan Thinglamtah phurmi cu thal caan a siih minung tibual le survorh tivek ih an ton ih an siat suah pang dah ti lo cun, a um ringring ding a zum um ko.

***

Daw Aung San Suu Kyi netabik thu le innsang 

November 13, 2010, (Sat) ah kan duhdawt mi kan Nu bik Aung San Suu Kyi cu kum 7 Inn-thawnginn a taannak ihsin suah zalen a si zo. Culawng si loin A fapa nauta sawn Kim Aris(kum-33) thawn an suah hnu a ni 10 nak November 23, Yangon Airport ah damten an tong-aw. A fapa hi kandung lam kum 10 lai ih a hmuh netabik ta mi a si. 1991 ih Nobel Prize laksawng ngahtu Pi Suu Kyi hi 1989 ah a hmaisabik kai thok hai in, hiti lai ah a fapa nauta tu Kim hi kum 11 mi te lawng a siih, a upa tu Alexander khal kum 16 ih upa lawng a si lai. Himi hnu kandung lam kum 21 sungah Pi Suu Kyi hi kum 15 sung rori innthawng ah an thlak hai. Cule a pasal Michael Aris hi cancer natnak ruangah 1999 (kum-53) ah a thisan. A thihhlan ah a nupi a tong duhzet nan Kawlram uktu pawl in kum  3 sung Visa an pek duh lo. Suu Kyi hin tu le 2 a neih zo nan tu tiang a hmu dah hrih lo. Thlacamnak thawn hmailam kekarnak ding hrangah kan bawm cio pei.

***

Tedim ah Bus Accident mi 17 thi

Friday, 26 November 2010

Laitlang Tedim khuapi, Cope Memorial Baptist Church (CMBC) Biakinn pi ah Zo Calai  an thoknak kum 100 kim Jubilee Puaipi (Nov. 26-28) an nei. An zate mipi zate 10000 lenglo an siih mikhual 8000 lai an kim. Cuih puai zawh dingin Tonzaang Khuapi ihsin Chin-Taung-Taan Bus ah mi 80 lai an to. Vansiat thlaktak in Tedim thlenhlan peng 10, Zalui  an thlen, Bus a feh cakzet ruangah zinkawinak ah lamzin naal deuh thawn a control thei nawn lo ih zinthlang kham pi 100 saang ah a khawhsuk aw. (Nov.26, sundir 12:00 ah a si.). Mi(12) cu a hmun ah an thi hngalh ih mi(5) cu Zato an thlen hnu ah an thi. Driver cu tutiang an hmu hrih lo. Bus cu a siatzam thluh, mi 30 lai cu hliamma besiazet an tuar ih Tedim Zato ah an zingbawl rero lai. Himdamte ih luat tla an um. Bus neitu hi Tahaan ih um U Cin Pu a si. Thlacamnak thawn kan bawm cio pei. 

Hram: Zogampost uudate News

Malaysia ih mithat thu November 21, 2010

Malaysia ram, Johor khua ah Tlangval (Kawl) in a fala nu (Kawl) a that. A falanu (kawlnu) paisa a dil ringring. Rm. 4,500/-  tluk lai a dil zo. “Paisa i pek lo le ka lo that ding” a ti theu. A vuak, a thawi, a hrem theu. Tlangvalpa hi mi huatsuak, zu-in, suamhmang a si, fala dang tla a nei. Paisa a dil ringring thotho. Thu an el-aw ih ''Ka lo duh ngaingai lo, ka lo duh bum men'' a ti. “Hnaihnok men na si thlang, ka lo hai nawn lo'' a tiih a fala hmaisa cu a that lawlaw. A ruak cu hnawmpen kiang ah a ret ta men. Tuksumza a si..

* Laimi fala pawl ralring cio uh. Kawl tlangval pawl cu mi-ngiar an paih tuk. Mi duh-bum an thiam tuk. Veikhat an ngah hnu cun, “Hnaihnok'' men in, an tiih, hnawmhne vekah an ruat men. Kawl zate cun an si lo nan, A tamsawn cu an si ko. Fala tlangval pawl in fimkhur a tul. Kan san hi san sia a si tihi hngilh hrimhrim hla. Thinlung hnakin neihnak hi a tlangpi in zoh a si zo..    hrm: Rihli

Aizawl (Mizoram) ah Sumu Accident

Zokhawthar (Tio) ihsin Aizawl ih khualtlawng Sumu cu Nov. 27,4:00 am, Durtlang (Aizawl) zinthlang ah a tla ih Pu Zir Lian(driver&owner) cu a hmun ah a thi cih ih passenger pa(2) cu Aizawl Zato ah an thi. Passenger(8) lam cu hliamma thawn Zato ah an zingbawl rero lai a si. Thlacamnak thawn kan bawm cio pei.        ... Editor

Thuthan

Thlacamnak: 

Pastor le Evant pawl innsang tin ah vehvai phah in thlacam saknak (November 22-24) an nei. 

Combine Meeting:

Nov.20,(Sat) ah Kawahhran a cak vivo theinak dingah le a liam cia cangvaihnak pawl thlirsaalnak le relkhawm- nak Combine Meeting kan nei ih mipum 35 lai kan kim thei. 

Innkhaan kauh: DBCF Biakinn sung cu inn neitu ih siannak vekin a sungih khaan hran cu kauhbet a si zo. Pathian in rem a ti ahcun inntlun tla

Crusade:

December zarh thumnak ihsin Crusade nei ding kan si. Thlacamnak thawn tan kan lak cio pei.

General Meeting:

Nov.28, 2010 (Sun) zingkhawm theh ah DBCF member zate General Meeting a um ding. 

Bupi Sumlut:

September thlasung sumpai cazin 1/10 - Rs. 77158/-, le Thawhlawm ah Rs.3660/-. Kan lungawi Petu zate parah Pathian in thlua- suah pe hram seh.

Mmber thar:

October thla sung member thar mipum(2) an kan nei. DBCF hi thluasuah ngahnak hmun ah cangter hram seh. 

Nau thar:

September thla sung Pathian laksawng nau thar kan Pastor ih ap sakmi pa(4) an kim. Kan lungawipi zet ih Pathian in lamhruai vivo hram seh. 

Ramleng in fehsan:

DBCF ih kum reipi sung pumpetu kan rinsan mi Pa Cung Bawi Hup innsang cu Nov. 15. 2010, USA ah in fehsan zo a si. Pathian in an tuah an thamnak ah thluasuahnak pe hram seh. 

Seminar: 

Nov.5, (Friday) Mino Department ih tawlrel mi  Seminar, Pastor Peng Thawng (LCC Asst. Pastor) parah siseh, 

“Leadership Training”: Nov 8-9, nihnih sung Pastor Johny le Evan Lal Lian Bik hohanak in kan nei thei. 

Youth Excurssion:

Dec.1(Wed), ah DBCFY Excurssion, Delhi khaw sung kan pal dah lonak hmun pawl ah kan feh ding. Mi pakhat ah Rs.50/-bur ding a si. Unau pahnih tlun cu pakhat free a si ding. Christmas Present Exchange a um ding ruangah packing tuah in ken fingfing ding a si. Mah le veng ih Mino E.C pawl hnenah theiter le paisa pek a a theih. Nov. 28 (Sun) netabik hmin pek theih a si. 

Carol Singing:

Christmas Carol Singing cu December 16-17 le 20-21 zaanli sung vak ding. Choir zir phah in Carol singing hrang ah hla kan zir thok zo. 

Nauhak Khawsung len:

Sunday School tlawngta pawl Dec.4, (Sat) ah khawsung lengnak a um ding.

***